Welcome to my heart

Орчлон дээр үй түмэн хүмүүс байдаг хэрнээ чамдаа би яагаад хайлаа вэ?...Welcome to my heart

Амьдрал бол дуу юм – түүнийг дуул

Амьдрал бол тоглоом юм – түүнийг тогло

Амьдрал бол сорилт юм – түүниийг сөр

Амьдрал бол мөрөөдөл юм – түүнийг биелүүл

Амьдрал бол золиос юм – түүнийг золь

Амьдрал бол хайр юм – түүнд дурла

Өнөөдөр 2 жоохон охин манай хаалгыг тогшоод гартаа барьсан чихэрээ аавд минь өгөөд "өвөө гадаа гарч тоглох уу?" гэсэн гэнээ. Ямар өхөөрдмөөр хөөрхөн дүр зураг харагдсан болоо. Өнөөдрийн энэ явдлыг сонсоод би бага насныхаа зарим нэг дурсамжуудаа эргэн бодлоо. Намайг багад манай гудамжинд хүүхдүүдийг хооронд нь уралдуулж гүйлгэдэг нэг эмээ байдаг байж билээ. Би нэрийг нь мэдэхгүй болохоороо "уралдуулдаг" эмээ гэж нэрлэдэг байсан юм. Тэр эмээг гараад ирхээр хүүхдүүд бид нар уралдуулдаг эмээ ирж байна гээд л гүйж очоод "эмээ бид нарыг уралдуулаарай" гээд л тойрч гүйлддэг байж билээ. Хүүхэд, хөгшин хүн хоёр хоорондоо хамгийн сайн ойлголцдог юм бол уу даа. Учир нь тэдний сэтгэл адилхан ариухан байдаг юм бол уу даа.

Яг л соронз шиг найз минь

Өөрийн мэдэлгүй татагдаад байдаг тийм нэг соронз шиг хүмүүс байдаг даа. Яг л тийм дотроо соронзтой нэг найз надад байдаг юм. Нэг л мэдэхэд тэр найзыгаа бага багаар улам бүр хайрлаад л, хайрлаад л, хайрлаад л... байх болж.  

 

... бодрол&ухаарал...

... - Чи яагаад намайг хайр гэж юу болохыг мэдэхгүй гэж байгаа юм бэ? хэмээн нар асуув.

- Хайртай болно гэдэг чинь цөл шиг нэг байрандаа байх юмуу, эсвэл салхи шиг даян дэлхийгээр хийсээд ч юмуу, чам шиг алсаас бүгдийг хараад байхыг хэлдэггүй юм. Хайр гэдэг нь Замбуулингийн Сүнсийг хувиргаж, сайжруулдаг хүч мөн. Намайг анх удаа түүнд нэвтрэн ороход тэр надад төгс төгөлдөр мэт санагдсан. Дараа нь би түүнийг бид бүхний л тусгал юм гэдгийг олж харсан. Түүнд ч мөн л хүсэл тачаал буцалж, дайн тулалдаан болдог юм билээ. Бид түүнийг тэтгэж байгаа. Тиймээс бидний аж төрж буй газар дэлхий илүү сайн болох, илүү муу болох нь бидний өөрсдийн сайн, муу байхаас хамаарна. Яг ингэхэд л хайрын хүч хэрэг болдог, яагаад гэвэл хүн хайрлаж эхлэхээрээ илүү сайн болохыг эрмэлздэг учиртай... Цөл ч тэр, салхи ч тэр, нар ч тэр, хүмүүс ч тэр юуны учир оршин буйгаа мэддэггүй... (Пауло Коэльо "Алхимич") 

Юуны төлөө оршин буйгаа ухаарч, өөрийгөө хайрын хүчээр дүүргэсэн тэр цагт бид өөрсдийгөө, дэлхийгээ, бүхнийг аварч чадна. Хүн бол ертөнц, ертөнц бол хүн... 

Би зүгээр л өөрийнхөөрөө амьдармаар байна...

Саяхны нэг өдөр хамт олон маань миний талаар ярилцлаа. Миний зан ааш, гадаад төрх, бүр цаашлаад сэтгэл зүрхний минь асуудал руу орлоо... хэхэ. Гэхдээ ярьж буй бүх зүйл нь миний сайн сайхны төлөө, намайг сайн яваасай гэсэндээ хэлж байгааг нь би ойлгож байлаа. Миний төлөө тэднийг тэгтлээ их санаа зовж явдагт нь баяралмаар санагдсан. Гэхдээ хүн бүрт өөр өөрийн гэсэн өнгө төрх, үзэл бодол, хувь тавилан байдаг гэдгийг тэд нэг л сайн ойлгохгүй байх шигээ. Хүн өөрийн хувь тавиланг хүлээж бус, бүтээж амьдардаг гэдэг үг нь үнэн боловч заавал бусад хүмүүст таалагдахаар бүтээх албагүй шүү дээ. Бусад бүсгүйчүүд гоолиг сайхан биетэй, ганган учраас би бас тийм байх албагүй, 30 настай ихэнх хүмүүс гэрэлсэн учраас би бас гэрлэх албагүй, бусад бүсгүйчүүд гэрэлхээсээ өмнө олон залуустай болзож туршлага хураадаг учраас би бас тэгэх албагүй, сэргэлэн бүсгүйчүүд сайн залуутай таармагцаа сээтэгнэж алдалгүй олж авдаг учраас би бас тэгэх албагүй. Би бусад шиг нас нь болсон учраас гэрлэж, нөхрөө мөнгөний автомат машин шиг харж, хүүхэд үйлдвэрлэдэг робот шиг амьдармааргүй байна. Харин сэтгэлийг минь мэдрээд намайг байгаагаар минь хайрлах, сайн, муу аль ч талыг минь хүлээн зөвшөөрөх цэвэр ариун сэтгэлтэй тийм хүн маань өөрөө аяндаа над дээр ирнэ. Тийм хүн байхгүй гэж бусад хүмүүс боддог боловч харин би байгаа гэдэгт итгэдэг. Би өөрөө өөрөөрөө л амьдармаар байна. Дуртай жинс, кэет, пудволкоо өмсөж, дуртай дуугаа сонсонгоо алхаал, чин сэтгэлийн хайртай хүнтэйгээ гэрлэж, ухаалаг хөөрхөн хүүхдүүдтэй болж, хорвоо ертөнцийг халуун, хүйтэн, цастай, бороотой, цэлмэг, бүрхэг, шуургатай, нартай, сартай, одтой нь байгаагаар нь бүхлээр нь мэдэрч хайрлан, өөрөө өөрийгөө гээчилгүй, хүн чанараа алдчилгүй би зүгээр л өөрөөрөө байгаа чигээрээ л амьдармаар байна.